Язучы - психолог

Үзәк китапханәдә "Язучы - психолог" исемле китап күргәзмәсе эшли. Әлеге күргәзмә язучы һади Кәримовка (Кәрим Кара) 70 яшь тулу уңаеннан оештырылды. Биредә укучылар авторның төрле елларда басылып чыккан китаплары, "Казан утлары" журналында басылган яңа әсәрләре, әңгәмәләр урын алган.
Кәрим Кара (һади Бари улы Кәримов)1956 елның 21нче июнендә Башкортстан Республикасының Учалы районы Ахун авылында ишле гаиләдә туа. Укырга иртә өйрәнә, кечкенәдән үк әдәбият һәм телләр өйрәнү белән мавыга.
Педагогик белем ала: институтны рус теле һәм әдәбияты укытучысы белгечлеге буенча тәмамлый.
Хезмәт эшчәнлеген Аскын районының Күнгәк мәктәбендә башлый. Нәкъ шунда ул булачак хатыны Альбинаны очрата. 1980 елда гаилә коралар, ике бала үстерәләр.
Иҗат юлы шактый соң башлана-язучылыкка көчле тартылу якынча кырык яшьтә күренә башлый. Башта аның хикәяләре район һәм республика басмаларында басыла. Соңрак аның әсәрләре даими рәвештә танылган журналларда («Казан утлары», «Сөембикә») һәм газеталарда («Безнең гәҗит», «Язмыш сынавы», «Акчарлак») басыла башлый.
Әдип үзе псевдоним сайлауны болай дип аңлаткан: «кара» сүзен ул «гади халык» мәгънәсендә алган — ул үзенең икмәкне үзләре эшләп табучы кешеләр белән бәйләнешен ассызыкларга теләгән.
2013 елда Кәрим Кара Татарстан Язучылар берлеге әгъзасы була. Шул ук вакытта аның «Ак күгәрчен, күк күгәрчен» дигән китабы да дөнья күрә.
2012 елда гаиләсе белән Тәтеш районының Келәш авылына күченәләр. Матур табигать һәм авыл тынлыгы әдипне яңа әсәрләр иҗат итәргә рухландыра: авыл халкы аның хикәяләрендә һәм повестьларында үзләренең авылдашларын, туган җирләрен тасвирлауларын таныйлар. Соңрак, 2019 елда, Кәримовлар Лаеш районына күченәләр.Бүгенге көндә Яшел Үзәндә яши.
Кәрим Кара утыздан артык повесть һәм бик күп хикәяләр авторы. Аның әсәрләрендә фәлсәфи уйланулар, укучыны тормыш мәсьәләләре турында уйланырга дәртләндерүче эчтәлекләр күп. "Гафу ит мине", "Җиләкле алан", "Без әнкәйнең йөрәгеннән чыктык", "Ак күгәрчен, күк күгәрчен" исемле китаплары дөнья күрде