Китапханәдә һөнәри юнәлеш көне (12+)

27 гыйнварда шәһәр Үзәк китапханәсенең татар әдәбияты һәм туган якны өйрәнү бүлеге хезмәткәрләре тарафыннан «Киләчәк безнең кулларда!» исемле һөнәри юнәлеш көне оештырылды.

Очрашуга республикабыздагы әйдәп баручы вузларының берсе «В.Г.Тимирясов исемендәге Казан инновацион университеты»ның Чаллы филиалы белгечләре чакырылды. Алар уку йортында белем алучы студентлар үзләштерә алырлык төрле һөнәрләр турында сөйләделәр һәм укырга керү кагыйдәләре турында тулы мәгълүмат бирделәр. Чара дәвамында студентлар мавыктыргыч формада  студент тормышын тәкъдим итте, «Только Мы» җыр һәм бию студиясе үз үрнәгендә бүгенге студентларның яхшы уку белән бергә үзләренең күпкырлы сәләтләрен дә ачып салуын күрсәтте. Бу хакта укучыларга күрсәтелгән кызыклы видеофильм дәлил булды. 

Күнекмә сыйфатында балалар блиц-викторинада катнашты, анда һөнәрне яки билгеле бер һөнәр вәкилен атарга кирәк булды. Дөрес җаваплар өчен истәлекле бүләкләр алдылар.   
Очрашуда катнашучылар тормыш юлын дөрес сайлауда башлангыч нокта булырлык мөһим мәгълүмат алды. Чара барышында уку йорты турында мәгълүмат белән буклет һәм китап кыстыргычлар таратылды, республикабызның уку йортларына багышланган китапларга күзәтү ясалды.