«Гомрем минем моңлы бер җыр иде, үлемем дә яңрар җыр булып...»
Иҗади чара танылган татар шагыйре Муса Җәлилнең тууына 110 ел тулуга багышлап уздырылды. Кичә барышында шагыйрь эзләре буйлап мультимедияле сәяхәт оештырылды, аның иҗат юлын гәүдәләндерүче аудио- һәм видеочыганаклар кулланылды, китапханәдәге материаллардан тупланган әдәби почмак төзелде.
...Китапханә залында моңлы татар көе яңгырый... Залның түрендә шагыйребезнең фотосурәте... Янәшәсендә түбәндәге шигъри юллар чагылыш тапкан.
Сынаулары аша сыный тормыш,
Җиз иләктән кат-кат үткәрә
Ә рухлары көчле булганнарны
Йолдыз итеп күккә күтәрә.
Биредә үк китап - җыентыкларыннан саркып шагыйрьнең мәңге кипмәс иҗат чишмәсе “агып ята” сыман. Әнә шундый дәверләр сулышы белән сугарылган үзгә бер, кабатланмас мохиткә килеп эләкте кичәбез кунаклары.
Чараның барышы берничә бүлектән гыйбарәт иде. Иң элек шагыйрьнең тормыш юлына кыскача күзәтү ясалды. Биографик белешмәләр экранда фотосурәтләр белән яктыртылып барды.
Икенче бүлек исә Муса Җәлилнең кабатланмас әдәби мирасына юнәлтелде. Биредә шагыйрь сүзләренә иҗат ителгән җырларның аудиоязмалары яңгырады, күрсәтмәле мәгълүмат чарасы буларак видеосюжетлар карап үтелде. Бөек шагыйребезнең ялкынлы иҗат җимешләрен укучылар телендә ишетү исә, күңелнең иң нечкә кылларын тибрәндереп җибәрде. “Кызыма”, “Яулык”, “Җилләр” кебек шигырьләре бүгенге буын вәкилләре чыгышында яңача яңгыраш алды.
Чараның соңгы бүлеге җанлы әңгәмә, кызыклы биремнәр белән үрелеп барды. Электрон форматтагы тематик башваткыч укучылар туплаган мәгълүматны актуальләштерергә ярдәм итте.
Җыр өйрәтте мине хөр яшәргә
Һәм үләргә кыю ир булып.
Гомрем минем моңлы бер җыр иде,
Үлемем дә яңрар җыр булып...
Әнә шундый танылган шигъри юллар белән тәмамланды бәйрәм кичәбез. Кунакларны залдан М. Җәлил сүзләренә С. Сәйдәшев иҗат иткән “Җырларым” аудиоязмасының моңлы көе озата барды.
Әлеге кичәнең якты хатирәсе күңелләрдә озак сакланыр, үткәннәр белән бүгенгебезне бәйләүче мизгелләр яшь җаннарда яңа хисләр уятыр дип ышанасы килә.
