Җырларыбыз башында - Тукай

                                                                       Балачактан озата килде Тукай   

                                                                       Шигырьләрдә,матур җырларда.   

                                                                       Иң беренче итеп өйрәндек без     

                                                                        Моңлы “Туган тел”не җырларга.                       

                                                                                                              Алсу Сибгатуллина

    Татар халкы үзенең бөек шагыйрен, җырчы улын Габдулла Тукайны онытмый, һәрчак күңел түрендә саклый. Ел саен 26 нчы апрельдә аның туган көнен билгеләп үтә.Ул әдәбиятыбыз күгендә балкыган йолдызларның иң яктысы.
    Бүген без китапханәдә 20нче мәктәпнең 4нче сыйныф укучылары өчен  "Җырларыбыз башында – Тукай" дип аталган әдәби-музыкаль кичә үткәрдек. Укучылар шагыйрьнең тормышы һәм иҗаты белән таныштылар, җырларын тыңладылар, шигырьләрен сөйләделәр. Шулай ук Г. Тукай иҗатын яктырткан әдәби күргәзмәгә күзәтү ясадылар.
    Кичә барышында "Өзек кайсы шигырьдән?", "Рәсемне таны", "Капчыкта нәрсә бар?" уеннарында балалар бик актив булдылар, белемнәрен күрсәттеләр. Кунакка килгән Кәҗә белән Сарык күңелләрне тагын да күтәреп җибәрде. Күчтәнәч итеп  капчыкта бүре башы түгел, ә Тукай китапларын алып килгәннәр иде, алар белән таныштырып та киттеләр. 
      Моңлы җырлар, шигырьләр белән үрелеп барган әлеге кичә балалар күңелендә озак сакланыр дигән теләктә калабыз.
           Халкым күңеленә ак нур сиптең,
           Кара төндә булдың якты ай.
           Шаулы язның сүнмәс тугаедай,
           Мәңге дәртле җырчы син, Тукай!