Салисә Гәрәева "Шигърият"

Шигърият

Шигърият ул сары сандугачның
Җыры гына түгел тирәктә.
Шигърият ул... акыл чамасының
Ярсып бәрелүе йөрәккә!

Ул – Җир тыны, ак каеннар моңы,
Карны ерткан уҗым кыягы!
Ул – акбүз ат, дала күкрәгендә
Йөрәк кебек тибә тоягы!

Ул – сүзсез җыр, күңел түрендәге
Бөреләнеп килгән хисләрем!
Ул – таң сере! Кояш! Җилкәсенә
Зәңгәр шәлен япкан кичләрем!

Шигърият ул - тургай кыңгыравы,
Кош канаты сызган ак юллар,
Һәм... без яшәп, сөеп, янып киткән
Саф мәхәббәт тулы ак еллар!

Ул – агымсу, чишмә чылтыравы,
Диңгез шавы, яңгыр биюе!
Мәхәббәт ул! Ефәк чәчләремә
Мин яраткан куллар тиюе!

Шигърият ул – Тормыш! Һәм аның да
Мәгънә тулы утлы мизгеле.
...Яшәешнең серен шигырь иткән
Минем кайнар йөрәк, билгеле!