«Куллар тудырган тылсым»: кул эшләре остаханәсе (16+)

15 нче санлы китапханәнең «Чишмә» клубында иҗат остасы Оксана Кочурова катнашында «Куллар тудырган тылсым» дигән кул эшләре остаханәсе узды. Ул төрле техникаларда креатив эшләнмәләр ясый: шоколад язмалар, сабыннан чәчәк гөлләмәләре, фоамираннан чәчәкләр, исемле беләзекләр, бәйләнгән йомшак уенчыклар һ.б.лар. Кунак үзенең иҗатка ничек килүе, уй-ниятләрен ничек тормышка ашыруы, яңа идеяләр каян алуы турында сөйләде. Оксана үзенең мастер-класслары белән шәһәркүләм мәдәни чараларда да актив катнаша. Бүгенге көндә ул бер урында гына тукталып тормый, үзенчәлекле берсеннән-берсе яңа уй-хыялларын чынга ашыра.
Чара вакытында ул сабыннан чәчәкләр ясау буенча мастер-класс күрсәтте. Аны әзерләү өчен сабын кайнатмасы, чәчәкләр өчен силикон форма, пластмасс чәчәк сабаклары, ароматизаторлар, буягычлар, матур тартма һәм, иң мөһиме, теләк кирәк булды. Кулдан эшләнгән сабын композицияләре гадәти чәчәк гөлләмәләрен алыштыра ала. Тере чәчәкләр тиз сула, ә сабыннан эшләнгән матур гөлләмә исә озак вакытлар хуш ис бүләк итәргә сәләтле. Үз кулларың белән ясалган чәчәкләр бары тик уңай тәэсирләр тудыра һәм эстетик зәвык тәрбияли алуы гаҗәп тә түгел.