«Без террорчылыкка каршы! Без ТЫНЫЧЛЫК яклы!»: фикерләшү сәгате (12+)

17 ел рәттән ел саен Россиядә 3 сентябрь көнне Террорчылыкка каршы көрәшкә теләктәшлек белдерү көне билгеләп үтелә.   

13 нче санлы китапханә шул уңайдан 5 сентябрь көнне яшүсмерләр өчен «Без террорчылыкка каршы! Без ТЫНЫЧЛЫК яклы!» дигән фикерләшү сәгате уздырды.

Чара барышында балалар бу истәлекле датаның кайчан барлыкка килүе, нинди фаҗигале вакыйгага бәйле булуы турында белде. Тыңлаучылар террорчылык мәсьәләсе, аның җәмгыятькә куркынычы, террорчылыкның нинди формалары һәм ысуллары булуы турында фикер алышты, кибертеррорчылык проблемасына кагылды. 

«Террорчылыкка каршылык күрсәтү» дигән видеоязманы карау аеруча зур кызыксыну уятты, анда террор куркынычы янаганда үз-үзеңне дөрес тоту кагыйдәләре турында сүз барды. 
Чарада террорчылыкка каршылык темасы буенча әдәбиятка күзәтү тәкъдим ителде. 

Чара очрашу темасына кагылышлы ун сораудан торган викторина белән тәмамланды. Барлык тыңлаучылар актив катнашты. Викторинада барысы да җиңү яулады, чөнки барлык сорауларга дөрес җавап бирделәр.