Бәхет алып кил син, Яңа ел!!!

              Табигатьне ап – ак карга төрде,

              Узып барган елның салкыны.

              Урамнарга сихри ямь өстәде,

             Агачларның гүзәл ак сыны

              Бар җиһанда ак кыш,

              Күңелләрдә сорау:

             Узып барган бу ел ни бирде?

              Кемдер әле аннан нидер көтә,

             Тырышканга шатлык китерде.

             Тик табигать көтми, үз кануны,

             Вакыт белән килә һәр чоры.

             Кызыл алка таккан миләштә дә,

             Яшел чыршыда да кыш җыры.

             Гүя, җиһан актан киенгән дә,

              Көязләнеп көтә Яңа ел.

             Теләкләр дә, өметләр дә зурдан,

              Ә юлыбыз шул ук изге юл!