“Габдулла Тукай – сүнмәс йолдызыбыз”

24 апрель көнне бөек татар шагыйре Габдулла Тукайның 139 еллыгы уңаеннан А.С. Пушкин исемендәге Үзәк китапханәнең татар һәм туган як турындагы әдәбият бүлеге китапханәчеләре картлар һәм инвалидлар йортында әдәби сәгать үткәрде. Чара Тукайның тормышы һәм иҗаты, татар әдәбиятына һәм мәдәниятенә бәяләп бетергесез өлеш кертүе турында таныштырып үтүдән башланды. Китапханәчеләр эчтәлекле презентация әзерләделәр, видео күрсәттеләр.

Әдәби сәгатьтә катнашучылар татар һәм рус телләрендә Тукай шигырьләрен укыдылар. Аларның күбесе бу юлларны яттан белә, бу исә үзенә бертөрле җылылык атмосферасы тудыра. “Туган тел”, “Китап”, “Кышкы кич” кебек танылган әсәрләр яңгырады. Шигырьләрен укыганнан соң, китапханәчеләр Тукай шигырьләренә язылган җырларны тыңларга тәкъдим иттеләр.

Чара җылы атмосферада узды һәм барлык катнашучыларда да иң күңелле тәэсирләр калдырды. Мондый очрашулар татар халкының мәдәни мирасын саклауга һәм популярлаштыруга ярдәм итә, шулай ук өлкән буын кешеләренә шатлык һәм аралашу бүләк итә.