Татар Дөм-Дөм авылында яңа фельдшер-акушерлык пункты ачылды
2025 елның 18 июлендә Татар Дөм-Дөм авылында яңа фельдшер-акушерлык пункты (ФАП) ачылышы тантанасы узды. Бу әһәмиятле вакыйга авыл халкы өчен медицина ярдәме сыйфатын һәм аның һәркемгә җиткерелүен арттыру юлында мөһим адым булды.
Тантанада Алабуга муниципаль районы башлыгы, Алабуга шәһәре мэры — Рөстәм Мидхәт улы Нуриев катнашты. Ул үз чыгышында ФАП төзелеше авыл инфраструктурасын үстерү һәм авылларда яшәү шартларын яхшыртуга юнәлтелгән комплекслы программаның бер өлеше булуын ассызыклап үтте.
Чарада Татар Дөм-Дөм авыл җирлеге башкарма комитеты җитәкчесе вазифаларын башкаручы — Назилә Наил кызы Галиева да чыгыш ясады. Ул район җитәкчелегенә күрсәткән ярдәме өчен рәхмәт белдерде һәм бу ФАП ачылышы авыл халкының сәламәтлеге һәм иминлеге өчен зур әһәмияткә ия булачагын әйтте.
Бәйрәм рухын авыл халкының актив катнашуы тагын да тулыландырды. Авыл китапханәчесе Венера Зиннур кызы Ибниева чараны оештыруда зур өлеш кертте — ул кунакларны үзенең фирменный ит бәлеше һәм хуш исле миләш бәлеше белән сыйлады. Өй ризыклары бәйрәм табынының күрке булды, кунакларга җылы, күңелле мохит бүләк итте.
Яңа фельдшер-акушерлык пункты заманча медицина җиһазлары белән тәэмин ителгән һәм халыкка беренчел медицина ярдәме күрсәтү өчен эшләнгән. Аның ачылуы авыл халкы өчен күптән көтелгән вакыйга булды — хәзер алар кирәкле медицина хезмәтләрен үз авылларында ук ала алачаклар.