Чын тормышта кайны шагыйрь уе...

Китап күргәзмәсе татар балалар шагыйре Җәүдәт Дарзаманның (1945-2019) тууына 75 ел тулуга багышланган.

Җәүдәт Харис улы Дәрзаманов (1945 - 2019) 1945 елның 13 октябрендә Татарстан АССРның Шөгер районы Сугышлы авылында (хәзер ТР Лениногорск районы) туа. 1964 елда Иске Шөгер урта мәктәбен тәмамлаганнан соң, Казан университетының тарих-филология факультетының татар бүлегенә укырга керә. Беренче курста ук армиягә алына, шуңа күрә ул укуны 1967 елдан башлап гына дәвам итә һәм 1972 елда университетны тәмамлый. З.Дарзамановның киләчәк язмышы журналистика белән бәйле. Башта ул радиокомитетта Балалар тапшырулары редакторы, аннары «Ялкын» балалар журналында әдәби хезмәткәр, 1988-1994 елларда әлеге журналның баш мөхәррире булып эшли. 1995 елдан Җәүдәт Дәрзаманов-Татар радиосының әдәби тапшырулар редакторы. 1961 елдан бирле басыла. Төп жанр-балалар өчен шигырьләр. Балалар өчен дистәдән артык китап авторы. Проза жанрында да үзен сыный. Рус теленә тәрҗемәдә аның «Төнге приключение» поэмасы - әкияте (1980) һәм «җир чакырулары» повесте (2002) басыла.