“Йөрәгемдә тормыш сөю минем, Йөрәгемдә Сезне ярату”

Күк йөзендә балкып янучы, яктылыгы буенча Кояштан, Айдан гына калышучы Чулпан йолдызын  икенче төрле Зөһрә йолдыз дип тә атыйлар. Фәндә ул –  Венера планетасы. Ничек кенә булмасын, ул бик якты яна.

Күктә Чулпан йолдыз янса, җирдә, безне туган төбәгебез – Балтач районында да шундый якты балкучы Чулпан йолдыз бар. Ул – Кариле авылында гомер итүче Чулпан Габделганиева. Менә ичмасам, исеме җисеменә туры килә аның: үзе данлыклы спортчы, үзе җәмгыять эшләрендә башлап йөрүче, үзе шигырьләр яза, үзе китаплар авторы... бу йолдызның яктылыгын аңлатырга сүзләр җитәр микән?

5 декабрь көнне Балтач Үзәк балалар китапханәсендә узган “Йөрәгемдә тормыш сөю минем, Йөрәгемдә Сезне ярату” дип аталган әдәби иртә танылган якташыбыз  – Чулпан Габделганиевага багышланды. Чарага килгән кунаклар – 1нче номерлы балалар бакчасының мәктәпкә хәзерлек төркеменә йөрүче балалар – Чулпан апаларының шигырьләрен сөйләделәр, киләчәкнең танылган спортчысы белән интервью оештырдылар, Чулпан Габделганиева кебек акыллы, зирәк булыр өчен,  логиканы үстерүче уеннар уйнадылар.