“Галәм киңлегендә”

11 апрель көнне “Карлыгач” балалар бакчасындагы яшь китап сөючеләр өчен Космонавтика көненә мавыктыргыч «Галәм киңлекләрендә» дигән чара үткәрлде.

Балалар серле йолдызлар һәм планеталар дөньясы, космонавтика үсеше тарихы белән танышты. Яшь сәяхәтчеләр игътибарына «Галәм киңлекләренә юл» дигән китап күргәзмәсе тәкъдим ителде.

Матур һәм эчтәлекле презентация катнашучыларда зур кызыксыну уятты, беренче космонавт Ю. А. Гагарин, космос, йолдызлар, Галәм турында шигырьләр яңгырады.

Гаҗәеп космос дөньясы

12 апрель көнне 5 нче санлы китапханәдә яшь китап сөючеләр өчен Бөтендөнья авиация һәм космонавтика көненә багышланган «Гаҗәеп космос дөньясы» дигән танып белү сәгате узды. Китапханәче белән берлектә балалар космик киңлекләргә сәяхәткә юл тотты. Кояш системасы планеталары, беренче космонавт этләр Лайка, Белка һәм Стрелка турында белде. Зур кызыксыну белән беренче космонавт Юрий Гагаринның тормыш юлы турында видеоролик карадылар. Чарада катнашучылар кызыксынып космос турында викторина сорауларына җавап бирделәр. Планеталарның исемнәрен искә төшерделәр, Җирнең ясалма иярченнәре турында сөйләделәр.