"Җәлилне укыйбыз"

Муса Җәлил – татар халкының бөек шагыйрьләренең берсе, ул үзенең шигъри иҗаты белән генә түгел, ә тормышы һәм фаҗигале язмышы аша да батырлык һәм героизм үрнәге булып тора. Аның шигырьләре тирән мәгънәгә һәм көчле рухка ия, ә тормыш юлы – ныклык һәм кыюлык символы. Теләче үзәк китапханәсе Муса Җәлилнең тууына 120 ел тулу уңаеннан «Җәлилне укыйбыз» дип исемләнгән әдәби акция оештырды. Әлеге мәртәбәле чарада 96 катнашучы – мәктәп укучылары, балалар бакчалары балалары, пенсионерлар һәм китапханәчеләр үзләренең иҗади осталыкларын күрсәтте. Акциянең төп максатлары – Советлар Союзы Герое, Ленин премиясе лауреаты, татар шагыйре Муса Җәлилнең тормышын һәм иҗатын киң җәмәгатьчелеккә таныту; аның иҗади мирасына кызыксыну уяту; актив гражданлык позициясе, гомумкешелек кыйммәтләре тәрбияләү, Ватан өчен күрсәткән батырлыкларыбыз белән горурлану хисен үстерү; туган телләрдәге әдәби әсәрләргә мәхәббәт һәм хөрмәт тәрбияләү. Катнашучылар үзләре теләгән Муса Җәлилнең әсәрен яки аның өзеген сайлап, өч минуттан артмаган видеоязмалар төшереп, аларны җибәрделәр. Барлык видеороликлар ВКонтакте социаль челтәрендәге китапханә битендә урнаштырылды. Акциядә шигырьләр татар һәм рус телләрендә яңгырады, бу мәдәни күптөрлелекне һәм телләребезнең байлыгын чагылдыра. Һәр катнашучыга электрон сертификат тапшырылды, ул аларның әлеге изге эштә катнашуын һәм шагыйрь иҗатын саклап калуга керткән өлешен раслый. Әлеге акция Муса Җәлилнең иҗатын яңа буынга җиткерүдә һәм аның рухи мирасына хөрмәт уятуда зур әһәмияткә ия булды.