“Әтиләр - илнең терәге, гаиләнең йөрәге”

Әтиләр көнен Россиядә октябрьнең өченче якшәмбесендә билгеләп үтәләр. Әлеге датага карата 18 октябрь көнне Урта Мишә авылы мәдәният хезмәткәрләре “Әтиләр - илнең терәге, гаиләнең йөрәге” дип исемләнгән очрашу үткәрделәр. Чарага иң күп балалы гаиләләр - Мухаммадалиевлар һәм Гусамовлар чакырылды. Очрашу барышында балалар “Минем әти – иң яхшысы” дигән анкета тутырдылар, әтиләренең эшләре, казанышлары һәм бергәләп нәрсә белән шөгыльләнергә яратулары турында сөйләделәр. Бу анкета балаларга әтиләренә булган мәхәббәтен һәм хөрмәтен белдерергә мөмкинлек бирде. Шулай ук китапханәдә әлеге көнгә карата “Әдәбиятта әтиләр образы” исемле китап күргәзмәсе куелды, ул әтиләрнең ролен һәм әһәмиятен аңларга ярдәм итте. Мондый чаралар гаилә кыйммәтләрен ныгытуга һәм җылы аралашу атмосферасы тудыруга ярдәм итә.