"Ленинградны яклаучыларның батырлыгы"
27 гыйнварда Арча агросәнәгать көллияте студентлары өчен Ленинград шәһәрен немец-фашист гаскәрләре блокадасыннан тулысынча азат итү көненә багышланган батырлык дәресе узды. Китапханәче тарихи белешмә белән таныштырды һәм «Через огонь и мглу блокады» китап-репортажын тәкъдим итте.
Чарада камалышта калган шәһәр тормышы турында шигырьләр, прозаик зарисовкалар яңгырады, документаль фильмнарның видеоматериаллары каралды. Катнашучыларга шул еллардагы чын кадрларны күрү, кешеләр яшәгән һәм көрәшкән шартларны яхшырак күз алдына китерергә мөмкинлек бирде. Чараның йомгаклау этабы Бөек Ватан сугышы елларында һәлак булган барлык мәрхүмнәр истәлегенә бер минутлык тынлык белән тәмамланды.