«Мин бу җирне Ватан дип атыйм»

29 июль көнне урта мәктәп укучылары өчен туган як тарихына багышланган күргәзмә-экскурсия узды. Һәрберебезнең дә тормышында күңелгә яткан бер почмак бар, һәрберебезнең үз туган ягы бар.

Китапханәче хикәясеннән балалар туган як – туып-үскән, беренче адымнар ясаган, беренче тапкыр “әни” дип әйткән урын икәнен белделәр. Бу – әти-әниләребез яшәгән, дусларыбыз белән үскән, укыган, уйнаган урын. Балачак елларын үткәргән урыннан да якын, кадерлерәк берни дә юк. Һәр кешенең үз туган ягы бар. Кая гына китсәк тә, безне һәрвакыт туган якка, үскән җирләргә тарта.

Һәркемнең үз шәһәренә, авылына мәхәббәте төрлечә чагыла икәнен белделәр. Мәсәлән, шагыйрьләр туган як турында шигырьләр яза, композиторлар көйләр иҗат итә, рәссамнар картиналар ясый, шулай итеп үз туган якларын данлыйлар һәм хәтерне мәңгеләштерәләр.

Шулай ук китапханәдә китап күргәзмәсе дә оештырылган иде. Анда туган як тарихы, нигезләнүеннән алып бүгенге көнгә кадәрге чорны, безнең төбәкне данлаган кешеләр турында сөйләүче кызыклы китаплар тәкъдим ителде.