«Матур бит ул, яхшы сүз»

13 гыйнвар көнне китапханәбездә «Матур бит ул, яхшы сүз» дип исемләнгән китапханә дәресе узды. Башта без балаларга бу көннең тарихы, рәхмәт сүзләренең әһәмияте турында сөйләдек.  Аннары укучыларга тылсымлы әдәплелек иленнән килгән хатны укыдык, анда явыз сихерче «Әдәпле сүзләр» агачын сихерләгән була. Агачны саклап калу өчен балаларга биремнәрне үтәргә, әдәпле сүзләр табарга һәм аларны агачка ябыштырырга кирәк иде. Балалар өчен беренче сынау «Әдәпле сүзләр түгәрәге» дигән бирем булды, анда укучылар таныш булган әдәпле сүзләр белән уртаклаштылар. Катнашучылар, рәхмәт хисләрен белдерүче «яхшы сүзләр» күрсәтеп, үз сүзләрен тәкъдим иттеләр. Укучылар, рәхмәт сүзе немец, инглиз, француз һәм күп кенә башка телләрдә яңгыравын белделәр. «Әдәпле - надан», «Сүзне әйтеп бетер», «Әкият персонажлары» дигән башка биремнәр дә актив үтте. «Сиңа янәшәдә булуың өчен рәхмәт» биреме балаларга үзләре ясаган яхшы эшләрнең бумерангы әйләнеп кайтуын ачык күрсәтте. Балалар шулай ук табышмакларны чиштеләр, әдәпле сүзләр әйтергә кирәк булган хикәяне укыдылар.

Чара азагында балалар бер-берсенә карата игелекле һәм әдәпле булырга ярдәм итә торган китаплар белән таныштылар.