МӨДӘРРИС ӘГЪЛӘМОВНЫҢ тууына 75 ел тулды.

ТУГАН ТЕЛНЕҢ, ТУГАН ҖИРНЕҢ КАДЕРЛӘРЕН АҢЛЫЙМ ДИСӘҢ,"ЕРАККА КИТЕП КАРА!"
13 октябрьдә, Г.Тукай исемендәге Дәүләт бүләге иясе, халык шагыйре МӨДӘРРИС ӘГЪЛӘМОВНЫҢ тууына 75 ел тулды.
МИН ТАБЫШМАК ЧИШӘМ
Яралганмын кара туфрагымнан,
Идел-судан, халык җырларыннан,
Ак яулыклы татар карчыгының
Яргаланып беткән кулларыннан.
Яралганмын әнкәм көлтә итеп
Бәйләр өчен җыйган учмалардан,
Көлтәләрдән учма булып кына
Безгә килеп җиткән кыйссалардан.
Яралганмын җил-давыллар узып
Исән калган агач башларыннан,
Чиркәүләргә нигез булып яткан
Бабамнарның кабер ташларыннан.
Яралганмын халык иҗат иткән
Табышмактан, әйе, табышмактан...
Әткәм хыялланып эзләп йөргән,
Җавап итеп әнкәм мине тапкан.
Тапкан табышмакка җавап итеп, -
Шулай тапкан әткәм эзләгәнен...
Тик барыбер бер табышмак булып
Калган минем һәрбер күзәнәгем.
«Үзе атлап йөрсен, дөнья күрсен» -
Еллар минем аяк-кулны чишкән;
«Тапкырлыкның татлы тәмен белсен» -
Туган халкым сөйләр телем чишкән.
...Яралганмын кара туфрагымнан,
Идел-судан, халык җырларыннан,
Хәзер инде дөнья, чишәр өчен,
Үз алдыма табышмаклар куйган.
Мин дә җавап эзлим әткәм кебек,
Мин табышмак чишәм нәселемә.
Аяк-кулын вакыт чишәр аның,
Сөйләр телен кемнәр чишәр менә...
Мин табышмак чишәм нәселемә.

АК КАЕННАР КҮЛӘГӘСЕНДӘ
Аккош күле, тагын сиңа килдек,
Яшьлек эзләп килдек, ә синдә
Күзне камаштырган ап-ак киңлек
Ак каеннар күләгәсендә.
Азмы калды синдә кышкы кичләр
Бураннары, көртләре белән.
Еллар үтә-үтә кеше нишләр -
Очрашмаса үткәне белән?!
Бу тәрәзә капкачларындагы
Һәрбер кадак таныш,
Һәр уем.
Ни хәл итим, ни хәл? Бит мондагы
Таянычлар ауган... ах, кыен!
Чүп үләннәр хәтта сагыналар:
Исән чакта кадрең юк, бәндә...
Алмагачлар кебек ауды алар -
Тамырлары киткәч тирәнгә.
- Зур булганнар икән, хәзер белдек, -
диеп дөнья сөйләшәсен дә...
...Ап-ак киңлек алар,
Ап-ак киңлек
Ак каеннар күләгәсендә.
Рәхмәт сиңа, Аккош күлендәге
Безне очраштырган Тирән күл,
Саегасың,
Тик бетмисең әле -
Чыганагың, димәк, тирәндер.
Саегасың, беләм... Сыкранам да,
Учлап кына тотам бәгырьне...
Иң гаҗәбе шунда: син һаман да
Саега барган саен кадерле.
Саега барган авыр көннәреңдә
Нинди тирән икән күңелең!
Күпне бирдең,
Күпне салдым иңгә,
Мин аз гына сораган идем.
...Менә тагын... янә сиңа килдек,
Без шигъри өн биләмәсендә...
Ап-ак киңлек алда,
Ап-ак киңлек
Ак каеннар күләгәсендә.
М.ӘГЪЛӘМОВ